Bizkaiko Foru Aldundiak eta El Correok antolatutako Autoenpleguaren Foroak pertsona ekintzaileek enpresa-sisteman eta gizarte-eraldaketan duten zeregina nabarmendu zuen joan den de ostiralean, irailaren 30ean. Ikaslan Bizkaia Euskalduna Jauregian ospatu zen ekitaldi honetara hurbildu zen, lurralde historikoaren ekintzailetza-ekosisteman murgiltzera eta honek dituen erronkak ezagutzera.
Ekintzaileak protagonista izan ziren Teresa Laespadak, Enplegua, Gizarte Inklusioa eta Berdintasuna Sustatzeko foru diputatuak, hasiera eman zitzaion jardunaldi honetan. Laespadak autoenplegua produkzio-aldaketa gidatzeko funtsezko eragile ekonomikoa dela eta Foru Aldundiaren arreta berezia jasotzen duela azpimarratu zuen. Izan ere, Enplegu eta Ekintzailetzako Foru Agentziak, DEMAk, Enpresari ideia-lehiaketa antolatzen du urtero, LHko Erdi-mailako eta Goi-mailako ikasleen artean ekintzailetza-kultura sustatzeko asmoz, eta 2022-2023 deialdirako izen-ematea irekita dagoela gogorarazi zuen diputatuak.
Jarraian, ekitaldira gerturatu ziren pertsonek autoenpleguari buruzko azken datuak ezagutu zituzten María Saizen, UPV/EHUko Ekintzailetzaren Euskal Behatokiko (EEB-OVE) presidentearen, eskutik. Biztanleriaren % 5 ekintzailea da Euskadin, eta ez da jaitsi autoenplegurako bultzada, baina sortutako enpresen kopurua murriztu egin da, eta joera nagusiena premiagatik ekitea da, aukeragatik baino. Enplegua sortzeari buruzko datu positibo bat eragin-ekintzailetza handitzea da, 20 langile baino gehiago izatea bilatzen baitu: sortutako enpresen % 25ek datozen 5 urteetan enplegua sortuko dutela espero da.
