Euskal LH publikoan matrikulatutako ikasleen % 60 baino gehiagok euskaraz ikasten dute

Lanekik, Ikaslan Araba, Ikaslan Gipuzkoa, Ikaslan Bizkaia eta Hetelen arteko elkarteak, Hizkelan jardunaldiaren zazpigarren edizioa antolatu zuen atzo era presentzialean, Gasteizko Mendizabala LHIIn, eta LHko ikastetxeetan eta enpresetan euskara sustatzearen aldeko jardunbide egokien trukean jarri zuen arreta.

“Euskara, batzen gaituena!” lemapean, Lanekik Euskadiko LHko erakundeetako eta enpresetako ehun bat ordezkari elkartu zituen hezkuntza- eta lan-eremuetan euskararen normalkuntzari buruz mintzatzeko. Lexuri Ugarte Aretxagak, Arabako Foru Aldundiko Euskara eta Gobernu Irekiko zuzendariak, eman zion hasiera jardunaldi honi, Ethazi metodologian, LH Dualaren ereduan eta ekintzailetzan euskarari ematen ari zaion bultzada aztertu zuena.

Mendizabala LHIIko zuzendari den Javier Otxoa de Alaizaren mintzaldiaren ostean, Eusko Jaurlaritzako Lanbide Heziketako Sailburuordetzako Plangintza eta Antolaketako zuzendariak, Nicolás Sagarzazu Alzuak, euskarazko LHko zikloetan izan den ikaslegoaren hazkundea azpimarratu zuen. Konkretuki, 2018-2019 ikasturtearekin alderatuz, B eta D ereduetan matrikulatu diren ikasleen kopurua 5.000 pertsonetan hazi dela adierazi zuen Sagarzazuk. Hori kontuan hartuta, ikasleen % 50 baino gehiago euskarazko Lanbide Heziketako zikloetan matrikulatuta daude ikastetxe guztiak kontuan hartuta, eta % 60 baino gehiago ikastetxe publikoen kasuan. Datu honek joera aldaketa nabaria erakusten du duela 8 urteko datuekin alderatuta; izan ere, datu horien arabera, ikasleen % 25ak baino ez zuen LHko ziklorik euskaraz ikasten.

Tomás Maguregi, Iurreta LHIIko zuzendari ohia, euskararen alde egindako lanagatik saritua

Hizkuntza-normalkuntzarako bideari laguntzearren, Hizkelanek beren arloetan euskara era esanguratsuan sustatu duten erakunde, enpresa eta eragileak saritu nahi ditu. Aitorpen hauetako bat Iurreta LHIIko, Ikaslan Bizkaia sarea osatzen duten 28 ikastetxeetako bateko, zuzendari ohi den Tomás Maguregik jaso du, eta gure erakundeak zoriondu egin du erretiroa hartu ondoren lortutako lorpenagatik.

Hizkelan jardunaldia Laneki elkartearen ekimena da, Ikaslan Bizkaia barne hartzen duen LHko erakundeen elkartea, gure erakundean eta ikastetxeetan euskararen normalkuntzan dugun inplikazioaren barruan. Lanekiren helburu nagusia euskarazko eduki didaktikoak sortzea eta materiala itzultzea da, Jakinbai webgunearen bidez lortutako dokumentazio guztia jendearen eskura jarriz. Era berean, irakasleek aukera dute bere kontura itzulitako edo sortutako materialak webgunean jartzeko, ikastetxeen arteko elkarlana sustatzeko.